ក្នុងសន្និសីទសារព័ត៌មានមួយលើយន្តហោះ ដែលនាំព្រះអង្គពីទីក្រុងអីុស្តង់ប៊ុល ប្រទេសតួកគីទៅកាន់ទីក្រុងរ៉ូមវិញ ពេលសួរព្រះអង្គពីភេរវកម្មរបស់បណ្តាក្រុមជីហាដ និងអ៊ិស្លាមនិយមជ្រុលដែលរីករាលដាល សម្តេចប៉ាបថ្លែងថា ព្រះអង្គទាមទារឱ្យមានការថ្កោលទោសមិនសំចៃ ពេលព្រះអង្គជួបពិភាក្សាកាលពីថ្ងៃទី២៨ វិច្ឆិកា ជាមួយប្រធានាធិបតីតួកគី លោករីសេប តៃយីបអ័រដូហ្គាន ។ ព្រះអង្គបន្តថា ខ្ញុំបានជម្រាបដល់ប្រធានាធិបតីតួកគីថា វានឹងជារឿងល្អដែលមេដឹកនាំអ៊ិស្លាមទាំងអស់លើពិភពលោក ព្រមទាំងមេដឹកនាំនយោបាយ សាសនា និងសាកលវិទ្យាល័យប្រកាសយ៉ាងច្បាស់ ហើយថ្កោលទោសអំពើហិង្សានេះដែលបំផ្លាញសាសនាអ៊ិស្លាម ។
ព្រះអង្គទ្រង់ធ្វើការកត់សម្គាល់ថា បែបនោះនឹងជួយដល់អ្នកកាន់សាសនាអ៊ិស្លាមភាគច្រើន ប្រសិនបើការថ្កោលទោសចេញពីមាត់របស់មេដឹកនាំនយោបាយ សាសនា សាកលវិទ្យាល័យទាំងនោះ ។ យើងគ្រប់គ្នាចង់បានការថ្កោលទោសជាសាកលមួយចំពោះបាតុភូតនេះ ។
សម្តេចប៉ាបហ្វ្រង់ស្វ័រ បានថ្កោលទោសចំពោះពួកអ្នកដែលនិយាយថា ជនអ៊ិស្លាមទាំងអស់ជាភេរវករ ក៏ដូចជានិយាយថា អ្នកកាន់សាសនាគ្រិស្តទាំងអស់ជាអ្នកគោលការណ៍និយម (FONDAMENTALISTES) ដែរ ។
សម្តេចប៉ាបមានបន្ទូលទៀតថា ពិតណាស់អំពើភេរវកម្មកើតមានមិនត្រឹមតែនៅអុីរ៉ាក់ ឬស៊ីរីទេ តែក៏នៅអាហ្វ្រិកផងដែរ ដែលនាំឱ្យមានប្រតិកម្មនានា ។ បើអ្នកណានិយាយថា នោះជាស្នាដៃអ៊ិស្លាម ខ្ញុំពិតជាខឹងហើយ ព្រោះការនិយាយបែបនេះនាំឱ្យអ្នកកាន់សាសនាអ៊ិស្លាមជាច្រើនរងការប្រមាថ ។ យើងពុំមែនជាមនុស្សប្រភេទនេះទេ ដោយគម្ពីរកូរអានជាធម៌សន្តិភាព ៕