បន្ថែមលើនេះ សម្រាប់ការប្រកួតដែលយកកីឡាករមកប្រកួតបំពេញជំនួសកម្មវិធីទាំងមូលភ្លាមៗនេះ ត្រូវបានគេមើលឃើញថា ការសម្រេចសេចក្តីរបស់ចៅក្រម ហាក់និយមពេញចិត្តផ្តល់ពិន្ទុទៅលើកីឡាកររបស់សមាគមកីឡាប្រដាល់ក្រសួងការពារជាតិ ព្រោះចៅក្រមភាគច្រើនមាននិន្នាការមកពីកីឡាកងយោធពលខេមរភូមិន្ទ។
សម្រាប់គូ ម៉ន ចាន់តារា មកពីក្លិបព្រែកឯងត្រូវបានចៅក្រមកាត់ក្តីឲ្យចាញ់ រិទ្ធ អារុណ មកពីក្រសួងការពារជាតិ បន្ទាប់ពីប្រកួតបាន៥ទឹកយ៉ាងស្វិតស្វាញ និងជក់ចិត្ត។ រិទ្ធ អារុណឈ្នះលើ ម៉ន ចាន់តារា វាហាក់បីដូចជាមិនសូវទំនងខណៈដែលអ្នកទស្សនាភាគច្រើនលាន់មាត់ថា ខ្សែធំ និងមានចៅក្រម ដែលមាននិន្នាការមកពីមជ្ឈមណ្ឌលកីឡាកងយោធពលខេមរភូមិន្ទ ធ្វើជាចៅក្រម និងគណៈកម្មការច្រើន។
ស្ថានភាពប្រកួតជាក់ស្តែង ម៉ន ចាន់តារា មានប្រៀបឈ្នះទឹក១ និងទឹកទី២ដាច់ ហើយនៅទឹកទី៣ មានភាពប្រហាក់ប្រហែលគ្នា ប៉ុន្តែនៅទឹកទី៤ រិទ្ធ អារុណ មានប្រៀបឈ្នះមែន ប៉ុន្តែត្រូវអាជ្ញាកណ្តាល ឡុង វ៉ាន់ថន ព្រមានកាត់ពិន្ទុអស់ដោយសារ អារុណ វាយថែមល្មើសការប្រកួត។លុះចូលទឹកទី៥ ម៉ន ចាន់តារា មានប្រៀបស្នៀតទាត់ បន្ថែមទៀតខណៈដែលការប្រកួតរបស់អារុណ មិនគោរពលក្ខខណ្ឌដោយមានវាយត្រូវប្រដាប់ការពារពងញឹកញាប់ វាយបន្ថែមទៅលើដៃគូ មិនតិចជាង៥លើកនោះឡើយ ប៉ុន្តែចុងបញ្ចប់ចៅក្រមបានផ្តល់ពិន្ទុឲ្យ រិទ្ធ អារុណ ឈ្នះយ៉ាងរំភើយទៅវិញ។
លោក ម៉ាង ម៉ន គ្រូបង្វឹកក្លិបព្រែកឯង បានស្រែកចំអកដល់គណៈកម្មការផងដែរ ចំណែកឯលោក ញាណ សុធី ដែលជាអ្នកគ្រប់គ្រង បានស្វាគមន៍ការប្រកួតរបស់ ចាន់ តារា ថា ប្រកួតបានល្អ និងទាក់ទាញបំផុត ហើយលោកប្រាប់ថា ការចាញ់ឬឈ្នះ គឺជាសិទ្ធិរបស់គណៈកម្មការមានចៅក្រមទាំង៥នោះហើយ។
មន្ត្រីបច្ចេកទេសប្រចាំសង្វៀនមិនអាចទាក់ទងសុំសម្ភាសបានទេ ហើយពិន្ទុដែលផ្តល់ដោយចៅក្រមទាំង៥ ក៏មិនត្រូវបានប្រាប់ឲ្យដឹងនោះដែរ ប៉ុន្តែសម្រាប់ លោក ម៉ាង ម៉ន បាននិយាយថា៖ «បើយើងមើលនឹងភ្នែកផ្ទាល់ទឹកទី១ ទី២ ទឹកទី៥ យើងឈ្នះ ចំណែកទឹកទី៤ក៏ឈ្នះដែរ ព្រោះការកាត់ពិន្ទុគឺត្រូវតែឈ្នះ ប៉ុន្តែលទ្ធផលគេឲ្យចាញ់ទៅវិញ»។
សង្វៀនអាស៊ីអាគ្នេយ៍ មានអ្នកទស្សនាច្រើន និងមានចៅក្រមភាគច្រើនក្មេងៗមកពីកីឡាក្នុងកងទ័ព ហើយការកាត់សេចក្តីការប្រកួតកន្លងមក មានភាពសុក្រឹត ប៉ុន្តែចំពោះមួយរយៈចុងក្រោយនេះ ជាពិសេសគូ រិទ្ធ អារុណ ឈ្នះលើ ម៉ន ចាន់តារា នេះគេមើលឃើញពីភាពលម្អៀងទៅរក រិទ្ធ អារុណ ខណៈដែលការប្រកួតល្មើសច្រើនសារហូតដល់កាត់ពិន្ទុទៅហើយ តែនៅតែកាត់សេចក្តីឲ្យឈ្នះ។
ចំពោះការសម្រេចឲ្យ សៀវ ង៉ុយ (ឈិត ង៉ុយ) មកពីក្រសួងការពារជាតិ ដែលឈ្នះកីឡាករ ចេង គា មកពីក្លិបសាលវ័ន្តកីឡា ក៏ទាំងមិនសូវទំនងដូចគ្នា ដែលធ្វើឲ្យអ្នកទស្សនាភាគច្រើនបំផុត ហាក់បីដូចមិនទាន់អស់ចិត្តចំពោះទិដ្ឋភាពបែបនេះ៕
No comments:
Post a Comment