លោក សេវ ហ្វិញ ប្រធានសហគមន៍ ភូមិឡំ ក្នុង ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី និងលោក ឆាយ ធី សកម្មជនសិទ្ធិមនុស្សអាដហុក បានប្រាប់ ភ្នំពេញ ប៉ុស្តិ៍ កាលពីម្សិលមិញថា ជនជាតិ ម៉ុងតាញ៉ា ពីរនាក់ត្រូវបានសមត្ថកិច្ច និងសន្តិសុខភូមិធ្វើការឃាត់ខ្លួនពីថ្ងៃព្រហស្បតិ៍សប្តាហ៍មុន។ ប៉ុន្តែព័ត៌មានពីការឃាត់ខ្លួននេះត្រូវបាននគរបាលបដិសេធនៅថ្ងៃដដែលនោះ។ លោក សេវ ហ្វិញ បញ្ជាក់ថា៖ «ប៉ូលិសជាមួយនឹងសន្តិសុខអ្នកចាប់ ហើយទំនងជាបញ្ជូនទៅវៀតណាមហើយ»។
ក្រៅពីនោះ លោក ឆាយ ធី ក៏បានឲ្យដឹងដែរថា មានរបាយការណ៍ពីអាជ្ញាធរវៀតណាម ផ្ញើជូនអាជ្ញាធរ ខេត្តរតនគិរី ដោយបញ្ជាក់ថា មានជនជាតិម៉ុងតាញ៉ា សរុបចំនួន ១៦ នាក់ហើយដែលបានឆ្លងដែនពី ខេត្តយ៉ាឡាយ ប្រទេសវៀតណាម ចូលមក ខេត្តរតនគិរី ចាប់តាំងពីចុង ខែតុលា កន្លងមក។ ទោះយ៉ាងណាអង្គការសិទ្ធិមនុស្សមួយនេះនិងបណ្តាញរបស់ខ្លួន ទើបតែបានរកឃើញជនជាតិ ម៉ុងតាញ៉ា ចំនួនតែ ១៣ នាក់ប៉ុណ្ណោះ។
លោក ឆាយ ធី បានថ្លែថា៖ «កន្លងមកយើងដឹងនិងរកឃើញតែ ១៣នាក់។ តែ ៣ នាក់ទៀតមិនដឹងទេ។ រឿងចាប់ខ្លួនវិញបើចាប់បានហើយមានការលាក់បាំង នោះវាជាការរំលោភសិទ្ធិមនុស្សធ្ងន់ធ្ងរ ហើយវារំលោភសន្ធិសញ្ញាស្តីពីសិទ្ធិជនភៀសខ្លួនផង»។ អាដហុក នឹងបន្តអង្កេតករណីនេះទៀត។
ទោះបីយ៉ាងណា លោក ងួន គឿន ស្នងការនគរបាល ខេត្តរតនគិរី បានថ្លែងថា មិនមានការចាប់ខ្លួននោះទេ។ ព័ត៌មានពីការចាប់ខ្លួននេះ វាមានការភាន់ច្រឡំទៅនឹងការចាប់ខ្លួនជនជាតិ វៀតណាម ចំនួន ៤ នាក់កាលពីថ្ងៃ ទី២៥ ខែវិច្ឆិកា នៅខណៈពេលដែលពួកគេចូលមកកាប់ឆ្ការព្រៃនៅតាមបន្ទាត់ព្រំដែន ដើម្បីធ្វើចម្ការ។
លោកស្នងការបន្តថា នគរបាលកម្ពុជា ក៏បានដោះលែងជនជាតិវៀតណាម ទាំងបួននាក់នោះវិញដោយសារពួកគេច្រឡំចូលកន្លែងដែលមិនទាន់មានបោះបង្គោលព្រំដែនច្បាស់លាស់។
ចំពោះការភៀសខ្លួនរបស់ជនជាតិម៉ុងតាញ៉ា ចំនួន ៣ នាក់ផ្សេងទៀត លោកស្នងការបានថ្លែងថា លោកទើបតែបានទទួលព័ត៌មានថា មានជនជាតិម៉ុងតាញ៉ា ផ្សេងទៀតបានឆ្លងដែនចូលមកក្នុង ខេត្តរតនគិរី។ ប៉ុន្តែមិនដឹងថា មានចំនួនប៉ុន្មាននាក់ ហើយចូលតាមច្រកណានោះទេ។ លោកស្នងការបញ្ជាក់ថា៖ «រឿងជនជាតិម៉ុងតាញ៉ា នោះអាចមានមកបន្ថែម តែមិនដឹងច្បាស់ប៉ុន្មាននាក់ទេ»។
មន្រ្តីអង្គការសហប្រជាជាតិប្រចាំនៅកម្ពុជា បានថ្លែងថា តំណាងអង្គការសហប្រជាជាតិបាននិងកំពុងស្នើសុំកិច្ចសហប្រតិបត្តិការ ពីរដ្ឋាភិបាលហើយ ការចុះទៅពិនិត្យពលរដ្ឋនៅ ខេត្តរតនគិរី ដែលគេអះអាងថា ជាជនជាតិម៉ុងតាញ៉ា នោះអាចដឹងនៅសប្តាហ៍នេះ។
លោក ងួន គឿន បានថ្លែងថា នគរបាលនឹងសហការជាមួយនឹងតំណាងអង្គការសហប្រជាជាតិ ក្នុងករណីដែលហេតុផលច្បាស់លាស់មួយត្រូវបានលើកឡើង៕
No comments:
Post a Comment